Солонгост хичээлийн шинэ жил хавар 3 сарын 1-нд эхэлдэг. Бага, дунд, ахлах сургуулийн сурагчид жил бүрийн 3 сарын 1-нд анги дэвшдэг гэсэн үг. Харин оюутнуудын элсэлт жилд 2 удаа явагдана. Хавар 3 сарын 1, намар 9 сарын 1-нд шинэ оюутнуудыг авна. Бүртгэлийн хугацаа тухайн сургуулиасаа хамаарч 1 жилээс 3 сарын өмнө эхэлдэг. Өөрөөр хэлбэл би 2012 оны 3 сарын элсэлтээр суралцая гэж бодож байгаа бол 2011 оны 6 сарын сүүлээс эхлэн сургуулиудын сайтаар элсэлтийн зар гарч байгаа эсэхийг судлан үзэх хэрэгтэй. Зарим сургуулиуд гадаад оюутны элсэлтийг 1 жилийн өмнө эхэлдэг. Ер дунджаар 2011 оны 9-11 сарын дунд гэхэд дийлэнх сургуулийн элсэлт явагддаг. Элсэлтийн материалыг авахдаа элсэх өргөдөл буюу application-ыг онлайнаар бөглөн түрүүлж явуулаад принтлэж аваад үлдсэн материалтайгаа нийлүүлэн сургуулийн бүртгэлийн хугацаанд амжуулж шуудангаар явуулахад болно.
Бүрдүүлэх материал :
Баклавр
- Application (бланк бий)
- Цээж зураг 4% орчим
- 12-р анги төгссөн гэрчилгээ
- 12-р ангийн дүнгийн хуулбар
- Суралцах төлөвлөгөө
- Өөрийн танилцуулга
- Санхүүгийн батлан даалт (10,000 $) Батлан даалт гаргагч хүний ажлын тодорхойлолт, ямар хамааралтай болох тухай
- Суралцаж байсан сургуулийн тухай мэдээлэл (бланк бий)
- Эцэг эх нь бүгд гадаад гэдгийг батлах бичиг баримт (эцэг эхийн иргэний үнэмлэхний хуулбар)
- Гадаад иргэн гэдгийг гэрчлэх бичиг баримт (иргэний үнэмлэхний хуулбар)
- Бүртгэлийн хураамж 100,000 вон орчим
Магистр, Доктор
Дээрхтэй ерөнхийдөө ижил нэмэлт материал нь
- Багшийн тодорхойлолт (Recommendation) 1 юмуу 2
- Бүтээлийн танилцуулга ( магистрын дипломын хураангуй гэх мэт)
Сургалтын төлбөрийн хувьд Солонгосын улсын сургуулиуд төлбөрийн хувьд арай л хямд. Дунджаар сургалтын төлбөр 1 семестр 3,5 сая - 5 сая орчим
Шинээр элсэж байгаа тохиолдолд элсэлтийн хураамж гэж төлдөг. Ойролцоогоор 1 сая вон.
Суралцаж байгаа салбар ухаанаас хамааран төлбөр харьцангуй өөр байдаг.
Нийгэм хүмүүнлэгийн ухаан - төлбөр хамгийн хямд
Байгалийн ухаан, Инженерын салбар - нийгмийн ухаанаас 1 сая орчим илүү
Монголд сургалтын төлбөрийг жилдээ 1 удаа төлдөг бол Солонгост 1 жилд 2 удаа төлдөг.
Зарим сургуулиуд гадаад оюутанд сургалтын төлбөрийн 50% тэтгэлэг олгодог. Энэ нь суралцах хугацаанд 2,7-с дээш голчтойгоор суралцах ёстой гэсэн тодорхой дүрэмтэй байдаг.
Хэрвээ дүнгээ хадгалж чадаагүй бол 50% ч авч чадахгүй хүрнэ гэсэн үг.
Гэхдээ та нэгэнт суралцахаар шийдсэн бол баклаврт бус магистр, докторт гадаадад суралцах нь танд арай илүү амар байх болно гэж зөвлөмөөр байна. Баклаврт дотоодын оюутны өрсөлдөөн хангалттай их учир тэр болгон гадаад оюутан төлбөрийн хөнгөлөлт аваад байх боломж багатай. Харин баклаврын дараах шатны сургалт нь өрсөлдөгч бага байдаг учир тэтгэлэг төсөлд хамрагдах боломж өндөр.
Энэ мэдээлэл танд бага ч болсон тус болоосой гэж хүснэм.
